O BNG de Ribadeo dá o seu apoio ao goberno municipal para a campaña a favor do comercio de proximidade. “Apostar polo que nós producimos e visitar o noso comercio é unha garantía para o noso tecido produtivo, así como un factor de dinamización e un sinal de identidade da vida económica e social das nosas vilas e cidades” sinalan desde o BNG ribadense.

Este tipo de iniciativas son vitais para os centros urbanos e barrios por darlle vitalidade ao comercio local. Por isto último, o BNG ribadense apoia as iniciativas da área de Comercio e Desenvolvemento Local, que leva Pablo Vizoso Galdo e o fomento das “panchas” para intensificar o comercio na vila e no resto do concello.

Desde a formación nacionalista apoian “mercar produtos de Vilaselán, Piñeira ou Ove; Cedofeita, Covelas, Arante, Couxela ou A Devesa; Santalla de Vilaousende, Rinlo ou Vilaframil, ao longo dos sucesivos domingos nos que se desenvolve o ‘Mercado dos produtos da horta'”.