A Xunta esgotará todas as vías xudiciais para lograr que se manteña a denominación de ría de Ribadeo fronte á decisión do Goberno central de dar carácter oficial ao topónimo ría do Eo.
Así o expuxo o secretario xeral de Política Lingüística, Valentín García, na Comisión de Educación e Cultura do Parlamento galego a preguntas do deputado do PPdeG Daniel Vega.
Será un recurso contencioso-administrativo ante o Tribunal Superior de Xustiza de Madrid despois de que se aceptasen os argumentos do Principado de Asturias, que o representante da Xunta non considerou “fundamentados”.
Así vinculou só a documentos privados a denominación de ría do Eo, mentres que asegurou que a de ría de Ribadeo aparece “en documentos oficiais”. “Sempre foi ría de Ribadeo”, insistiu.
Tras acabarse a vía administrativa, asegurou que irán aos tribunais e que esgotarán todas as vías posibles. “Abócannos a un conflito no ámbito xurídico“, lamentou Valentín García, quen lembrou que o preito se ultima cos letrados da Xunta e as universidades de Vigo e Santiago e con asesoramento da Real Academia Galega (RAG).
