A subdelegada do Goberno en Lugo, Isabel Rodríguez, copresidiu hoxe, xunto co alcalde de Ribadeo, Fernando Suárez, a Xunta Local de Seguridade que analizou a situación da seguridade cidadá e na que se constatou unha tendencia á baixa na delincuencia. Na reunión celebrada esta mañá na Casa do Concello participaron, ademais da subdelegada do Goberno e o alcalde, representantes da Garda Civil e do Subsector de Tráfico, da Policía Local e da Policía Autonómica.

O rexedor destacou a colaboración entre institucións: “o traballo coordinado e conxunto das Forzas e Corpos de Seguridade permite que hoxe poidamos congratularnos das cifras acadadas e desa tendencia á baixa da delincuencia no noso concello, aínda que non por iso imos baixar a garda”.

Segundo os datos facilitados esta mañá a taxa de criminalidade en Ribadeo está no 16’41 por mil habitantes, 8 puntos por debaixo da media da provincia de Lugo e tamén se rexistrou un descenso no número de delitos cometidos que pasaron de 200 no ano 2021 a 161 no ano 2022.

Suárez Barcia subliñou que “Ribadeo segue a ser un lugar seguro, dos máis seguros do Estado e agardamos que sigamos con esta tónica durante moitos anos máis. Para iso tamén é moi importante a colaboración da veciñanza, a súa axuda sempre é moi importante para poder esclarecer moitos casos”.