O Concello ofreceu unha recepción a Irene García Valle, remeira ribadense que se proclamou subcampioa de España en skiff cadete de larga distancia.

No acto desenvolvido no salón de plenos a deportista declarou: “contaba con quedar nunha boa posición porque á fin e ao cabo estaba adestrando, pero non esperaba conseguir a medalla de prata porque ao ser de primeiro ano competía con máis maiores. Era o meu primeiro ano de cadete e entón ía cun pouco máis de medo porque son máis grandes e é máis difícil entrar nese pódium. Pero cando saíron os tempos publicados na Federación estaba cunha amiga e díxomo, entón foi unha emoción enorme porque non mo esperaba; sabía que o facía ben pero non esperaba a prata. Sentín moi ben, estaba moi contenta”.

O alcalde, Fernando Suárez, e o concelleiro de Deportes, Jorge Díaz, felicitaron a Irene García Valle pola medalla conseguida e tiveron palabras de agradecemento para a súa familia, para os adestradores e tamén para o Club de Remo de Ribadeo. O rexedor dixo: “estamos moi agradados de recibirte aquí institucionalmente, como veciña de Ribadeo, polo teu esforzo, polo teu sacrificio e polo teu resultado, aínda que senón tamén te habíamos recibir igual. Queremos destacar o esforzo deste deporte que está un pouco minorizado pero que non é minoritario, que é moi duro polas mareas, polo clima, por todo”.

O edil de Deportes manifestou: “sabemos que as condicións nas que se adestra non son as ideais porque dependen moito das mareas. Entón hai horarios intempestivos, difíciles, complicados de compatibilizar cos estudios, nos que sei que tamén é unha rapaza aplicada”. Xunto a Irene García Valle estiveron a súa familia así como os concelleiros de Igualdade de Facenda, Mónica Freire e Pablo Vizoso, e o técnico de Deportes, Iván López.