A liña de media distancia Ferrol-Ribadeo segue coas frecuencias reducidas un 75% a pesar de que xa non existen restricións de mobilidade. Así o sinalan dende a Plataforma pola defensa do ferrocarril Ferrol- Ribadeo, que consideran que a redución de frecuencias incumpre a regulación europea e estatal que obriga a garantir os servizos ferroviarios declarados como “Obrigación de Servizo Público” (OSP), entre os que se atopa o de Ferrol-Ribadeo.

Concretamente, din, esta redución de frecuencias supón un incumprimento do acordo asinado en decembro de 2018 polo ministro José Luis Ábalos Meco e a empresa pública Renfe Viajeros, no que se determinan as condicións para a prestación dos servizos ferroviarios suxeitos a obrigacións de servizo público para o periodo 2018-2027. Ademais, sinalan, non só se está incumprindo un contrato legal, senón que “se deixou completamente abandonada á poboación afectada, sen ningún tipo de información e cun descoñecemento total sobre o futuro da liña Ferrol-Ribadeo”.

Segundo afirman, a única resposta que deron é que “a oferta de frecuencias permitida nestes momentos é equivalente ao 30-40% da oferta anterior á pandemia. A oferta ampliarase gradualmente a medida que se vaian recuperando os índices de ocupación nos trens”. Pero os índices de ocupación, consideran, non se poderán recuperar nestas condicións, xa que cun só tren diario en cada dirección é imposible utilizalo con normalidade. Nin se consigue ter tampouco capacidade para saber o uso do servizo posto que “non contan con persoal de intervención suficiente”.

Trátase, por tanto, dun “novo agravio para uns veciños e veciñas que levan máis de 420 días sen servizos”. A situación, din, empeora ao non existir alternativas de transporte público reais, xa que “os autobuses non teñen horarios adecuados, non cobren toda a liña, alongan o tempo de transporte e xeran moitas dificultades para a xente con problemas de mobilidade”.