Ribadeo prepárase para recibir a peregrinación “Madre Ven”, que vén dende Éfeso cunha Virxe María que recorre a Península Ibérica parando en diferentes santuarios. A imaxe chegou en avión a Zaragoza, dende onde emprendeu o camiño.
O Club de Actividades Subacuático Illa Pancha será o encargado de facer o recibimento da Virxe na tarde do 8 de xullo. En declaracións á Cadena Cope, o presidente do club, Chema Sanurjo, estima que a chegada ao asturense porto de Figueras será arredor das 17.00 horas. Dende alí, diferentes embarcacións acompañarán á Virxe ata o Porto de Ribadeo.
Ademais, en Ribadeo, os mergulladores do Club de Actividades Subacuáticas de Ribadeo irmandarán a súa Virxe coa que chega dende Éfeso. O club de mergullo ten unha virxe propia, que pasa o ano sumerxida na auga e sae polo día do Carme, patrona dos mariñeiros. Este ano adiántase a súa saída á superficie para irmandarse coa imaxe peregrina.
Chema Sanjurjo, en declaracións á Cope, apuntaba que será “unha celebración moi emotiva”, e que á peregrinación “Madre Ven” lle “parece un milagro, porque van sucedendo recibimentos moi bonitos cos que non contaban“.
Tras o acto no peirao de Porcillan de Ribadeo, subirán á virxe á Igrexa de Santa María do Campo, onde se levarán a cabo celebracións litúrxicas e seguirá a súa peregrinación por Galicia.
