A deportista ribadense Ana Iglesias Sobrino é unha das xogadoras de rugby 7 da selección galega, que quedou sucampioa no campionato de España. A Casa do Concello recibiu á deportista, que deu as grazas pola boa acollida do concello.
Ana Iglesias Sobrino comentou que “agora estamos cos torneos de verán e a partir de agosto empezarei a pretempada para despois volver ás competicións”.
O concelleiro de Deportes, Jorge Días, quen desculpou que a concelleira de Igualdade non estivese presente, agradeceu o esforzo de Ana Iglesias e “que leves o nome de Ribadeo a onde vas”. Tamén comentou que o agasallo que lle entregaron foi elaborado á man pola Asociación de Axuda ao Enfermo Mental da Mariña e reproduce o faro da illa Pancha.
Pola súa banda, o alcalde de Ribadeo, Fernando Suárez, destacou o empeño de Ana Iglesias “en seguir demostrando que es das mellores a nivel galego e nivel de estado”. “É para nós unha honra recibirte unha e outra vez, e todas as que fagan falta. Temos que cambiar o trofeo para que non os teñas repetidos, pero para nós é unha honra que leves o nome de Ribadeo tan ben por aí adiante”, concluíu Fernando Suárez.
