Círculos de diferentes cores e diámetros decorarán as rúas de Ribadeo. Esta é a iniciativa Zonas Cativas, que pretende crear espazos “máis amables” no entorno dos centros Gregorio Sanz e Sagrado Corazón. Os traballos de pintado comezarán esta semana, e estenderanse ao longo das rúas Carlos III, Alfredo Deaño e Avenida de Luarca.
Esta iniciativa busca “converter os espazos urbanos que usan os nosos nenos e nenas en áreas máis amables a través de formas e de cores lixeiras”, explicou a concelleira de Educación e Igualdade, Mariluz Álvarez. Ademais, tamén servirá para atraer a atención dos condutores para que circulen con especial precaución nestes espazos onde é habitual a presenza de cativos, como o entorno dos colexios. Lastra sinalou que “a densidade de círculos vai in crecendo segundo nos acercamos aos puntos de entrada e saída tanto dos centros escolares como das instalacións deportivas”.
Pola súa banda, a concelleira de Obras e Servizos Sociais, Mónica Freire, apuntou á necesidade de adaptar os espazos ás demandas da infancia e adolescencia, facendo mención á Axenda 2030 para o Desenvolvemento Sostible das Nacións Unidas e aos seus obxectivos. “Con esta iniciativa de creación de Zonas Cativas o que pretendemos é dar un chanzo máis nesa planificación e xestión urbana, onde deseñamos a nosa vila dende a perspectiva das nosas crianzas”, comentou Freire.
Segundo adiantaron ambas concelleiras, os traballos de pintado quedarán rematados nos vindeiros días.
