O Concello de Ribadeo organiza para este domingo 29 de agosto, unha nova edición da xornada Toma Tomate, que inclúe diversas actividades para homenaxear a esta hortaliza. Todo isto será dentro da área do mercado municipal.

Así o anunciou o concelleiro de Desenvolvemento Local, Pablo Vizoso, quen engadiu que a xornada celébrase “continuando coa aposta por unha alimentación saudable e sostible”.  O Toma Tomate segundo Vizoso, “é unha xornada homenaxe a este produto da horta tan noso”.

O concelleiro especifica que “desde primeira hora da xornada, coa colaboración do centro “Pedro Murias” terá lugar unha mostra das variedades deste alimento”. Para reforzar esta mostra, os membros do centro compartirán a súa experiencia e coñecemento do seu cultivo.

Ademais,  tamén se abrirá a exposición Alimentación Cotiá, presente e pasado, que fai un percorrido pola historia da alimentación da zona e as relacións comerciais ao longo do tempo.

A partir das 11.00 os nenos e as nenas menores de 3 anos poderán desfrutar do obradoiro Comer tamén conta, unha experiencia sobre comer saudable e de forma sostible. Despois, desde as 13 horas e para tódolos públicos, a banda Otus Scops poñerá o toque musical a esta xornada.

Ademais, para degustar o tomate cultivado nas hortas de Ribadeo, os establecementos de hostalaría da contorna prepararán tapas con tomate como ingrediente principal. Os participantes son:

Bar Queimada: Patacas en salsa de tomate picante.

Ribeira: Tomates recheos de atún.

Bar Prohibido: Tartar de tomate negro de Crimea.

Fumarel: Boquerón con romescu e améndoa garrapiñada.

“Con este tipo de actividades o que pretendemos é resaltar a importancia dos produtos de proximidade da nosa horta”, rematou o concelleiro Pablo Vizoso.