A empresa concesionaria do ximnasio municipal e da piscina, BeOne, renovou as máquinas de tonificación e peso libre. O investimento ascendeu a 102.000 euros. O de Ribadeo é o primeiro centro de Galicia no que esta firma instala estes novos aparatos de alta gama. O alcalde, Fernando Suárez, e o concelleiro de Deportes, Jorge Díaz desprazáronse até o xomnasio e canda eles estivo o director do centro, Javier Canel.

O alcalde ribadense manifestou que “tal e como está establecido no prego de cláusulas que rexen a concesión administrativa do complexo deportivo da piscina municipal, o concesionario das mesmas, é dicir, a empresa BeOne renovou estes días todas as máquinas de tonificación e peso libre do ximnasio municipal“. Substituíronse as antigas máquinas por outras novas, modernas e de alta gama e tamén se substituíron “8 bancos e todas as pesas, desde 2´5 ata 40 quilos, por outras desta mesma marca e mesma gama”.

Suárez Barcia sinalou que “a cantidade económica que supuxo esta renovación da maquinaria foi duns 102.000 euros e todo isto ven moi ben para ofrecer máis posibilidades, máis calidade e máis servizos á cidadanía deste concello e da comarca”.

O rexedor dixo que “coincide agora tamén precisamente nun momento en que todo indica que estamos saíndo da pandemia e agora as capacidades autorizadas do 75% nos ximnasios xa permiten que moita xente vaia retornando a estas actividades de interior”. Suárez Barcia tamén sinalou a importancia destas instalacións deportivas “para que moita xente que non practicaba deporte antes, pois aproveite agora para facelo”.