O Concello de Ribadeo reparte, de xeito gratuíto, outros 300 botes de produto desinfectante entre os propietarios dos cans. O obxectivo é conciencialos da obriga de limpar os ouriñes das mascotas, algo que recolle a nova ordenanza de limpeza viaria e xestión de residuos.

O concelleiro de Medio Ambiente, Jorge Díaz, declarou que “unha das obrigas da ordenanza é levar un bote para as miccións dos cans para usar nas entradas dos edificios e das casas, cuxas paredes se ven afectadas”. Haberá que usar un recipiente cun líquido desinfectante ou cunha pinga de lixivia para que os ouriñes se dilúan. “Aprobamos unha partida económica para a adquisición dos 300 botes cos que agasallaremos a aqueles que o soliciten”, declarou Díaz.

O edil ribadense subliñou que “esta é unha ordenanza que regula e que axuda a manter a vila nas mellores condicións. Temos varios expedientes sancionadores en marcha, que afectan a particulares e empresas, debido a certos comportamentos incívicos detectados”.

O Concello de Ribadeo xa repartiu o pasado mes de marzo outros 500 botes de desinfectante entre os propietarios e propietarias de cans. A nova partida xa está a disposición dos interesados.