O Concello adxudicoulle as obras de mellora da Escola Municipal de Covelas á empresa Construcciones López Tella. O investimento ascende a 46.600 euros. Os traballos, que xa deron comezo, foron supervisados polo alcalde, Fernando Suárez, e polos concelleiros de Obras e Medio Rural, Mónica Freire e Marcos Villamil.
O edil ribadense contou que “hai uns días que adxudicamos as obras de mellora para facer o cambio da carpintería de exteriores para mellorar o illamento térmico, sanear e recuperar as cornixas do edificio”. Ademais engadirase a dotación dun novo pavimento antiesvaradizo no perímetro exterior da Escola, melloras na electricidade e iluminación, pintura exterior e interior así como a dotación de mobiliario.
Marcos Villamil engadiu “esperemos que dentro de pouco tempo esta vella Escola luza como se fose unha nova para seguir planificando actuacións de índole educativa, cultural ou de lecer”. Villamil apuntou tamén ir logrando que a cidadanía volva recuperar o contacto que todos perdemos durante a pandemia.
