O alcalde, Fernando Suárez, remitiulle unha carta ao conselleiro de Sanidade, Julio García, referente ao centro de saúde de Ribadeo. O rexedor asegura que o Concello na actualidade non posúe unha parcela en solo urbano de cando menos 2.565 metros cadrados para levantar unha nova instalación. E subliña que “iso non significa que non asumamos ese compromiso recíproco de estar á vosa disposición para cumprir coa vosa petición, sempre que sexa economicamente viable e tecnicamente posible”.
Suárez Barcia demanda reforzos de persoal para o centro de saúde de Ribadeo, que ten menos profesionais agora que hai dez anos, e tamén que se valore redeseñar o edificio actual, xa que conta con amplos espazos baleiros e mal aproveitados.
O alcalde dixo que se lle enviou ao conselleiro esta carta porque xa se leva demandando formalmente “a reversión dos recortes que desde a Consellería viñeron facendo nestes últimos anos en materia de persoal sanitario”. O cadro de persoal médico quedou reducido nun 50 por cento que pasou de 6 a 3 facultativos actualmente, “os cales de xeito puntual son reforzados con outra profesional do PAC”.
Suárez Barcia sinalou que no tocante á propia infraestrutura do edificio actual, o alcalde destaca a inmellorable situación, no corazón da vila, que é facilmente accesible a pé e máis en coche. Pola contra, “tamén ten deficiencias e están á vista, pois necesita un novo deseño xa que ten amplos espazos baleiros e mal aproveitados, ademais de adoecer de algo fundamental como accesos independentes ás consultas e ao Punto de Atención Continuada (PAC)“.
Na carta dirixida ao conselleiro de Sanidade Fernando Suárez indicou que o Concello de Ribadeo actualmente non posúe unha parcela en solo urbano para as obras de mellora. Así e todo, iso non significa “que non asumamos o compromiso recíproco de intentar cumprir coa petición que eles nos fan, sempre que sexa economicamente viable e tecnicamente posible”.
Por último, Suárez engadiu “pero en todo caso o que plantexamos é ter unha xuntanza cos técnicos da Consellería de Sanidade xunto cos técnicos municipais para avanzar no diálogo e no compromiso noso, desde logo, de buscar unha solución satisfactoria para a mellora do Centro de Saúde de Ribadeo”.