Nas zonas verdes do Centro Integrado de Formación Profesional (CIFP) Porta da Auga, de Ribadeo, realizouse unha actividade de corta e poda de árbores coa colaboración do Centro de Formación e Experimentación Agraria (CFEA) Pedro Murias, que está situado na parroquia ribadense de Vilaframil e conta cun ciclo medio dual de Aproveitamento e Conservación do Medio Natural, e da empresa Agroforestal Rouco, do Valadouro.
O director do CIFP Porta da Auga, Isidro Berdeal, explicou que “nas zonas verdes do centro tíñamos varias árbores que levaban uns anos sen podar e sen os coidados“. Outras árbores afectaban “a determinadas estruturas cando había algo de temporal porque estaban moi altas e podían supoñer un risco para as xanelas e para determinadas estruturas do centro”.
Desta maneira aproveitouse que no centro Pedro Murias había un ciclo formativo relacionado co sector forestal. A proposta do CIFP encaixaba na programación dos seus módulos formativos para facer determinadas prácticas de corta e de poda das árbores. Posteriormente os restos que quedaron das árbores foron eliminados pola empresa Agroforestal Rouco, que xa tiña participado noutras colaboracións co CIFP e prestou a máquina que serviu para facer prácticas de triturado.
Isidro Berdeal considera que foi unha actividade interesante “para o alumnado, que puido traballar con máquinas de última xeración e quedaron sorprendidos do seu funcionamento“. Tamén resultou satisfactoria para os propios centros, que fixeron unha colaboración da que se benefician ambas comunidades educativas.
