Nove alumnas e alumnos asistiron o sábado en Ribadeo, no restaurante El Huerto, á primeira sesión do curso de formación en hostalería organizado por Apaga (Asociación de Profesores de Automoción de Galicia). Os asistentes abordaron o uso da dotación básica dun restaurante, así como a asistencia no pre servizo, a elaboración á vista do cliente e os tipos de servizos e a súa aplicación. No caso do bar-cafetería o curso céntrase na utilización da maquinaria, equipos, útiles e enxoval, preparación e presentación de aperitivos, cervexas, augardentes e licores de maio consumo nestes locais e preparación e servizo de bebidas non alcohólicas. A segunda sesión será o vindeiro sábado, 7 de maio.

O presidente de Apaga, Álvaro Doural, incide en que “levamos meses vendo as necesidades da hostalería. Cada día lemos nas súas redes sociais e nos medios de comunicación que se buscan camareiros, axudantes de cociña, cociñeiros, persoal de sala, camareiras/vos de pisos… A oferta na Mariña é enorme, pero todos eses postos de traballo non se cobren. Vímolo esta semana Santa e volverase a repetir no verán, salvo que entre todos fagamos algo por mellorar esta situación”.

Doural engade: “hai moitas posibilidades de traballo no sector da hostalería e da restauración nesta comarca, pero non hai persoal suficiente para cubrir esas vacantes”.