Concluíron en Ribadeo os cursos de formación en hostalería, que se celebrou o 30 de abril e o 7 de maio, e o de diagnose de vehículos, que tivo lugar o sábado e domingo nas instalacións Apaga (Asociación de Profesores de Automoción de Galicia). A actividade formativa de Apaga seguirá nas próximas semanas.
Para os días 11 e 12 de xuño está programado un curso sobre soldadura mig mag e os días 19 e 20 de xuño outro sobre climatización no automóbil. E prepara tamén un curso sobre drons. Álvaro Doural, o presidente de Apaga, conta que “imos continuar agora con máis intensidade con outros cursos. Un sobre drons no que vai permitir sacar a titulación necesaria para voar con dron, un de soldadura mig mag e outro sobre climatización no automóbil. Ademais xa estamos a preparar o Fórum de Innovación, que se realizará a finais do mes de agosto”.
Apaga segue tamén coas súas actividades europeas: “continuamos tamén con toda a actividade europea, que é frenética. Neste momento hai dous grupos de profesores en Croacia e en Francia, e haberá unhas próximas saídas a Estonia e a República Checa. Na semana das Letras Galegas haberá aquí unha reunión transnacional sobre o proxecto de aprendices. De agora ao mes de decembro vai haber unha intensidade tremenda dos proxectos europeos nos que estamos, porque neste momento estamos a executar o de 2020, estivemos dous anos parados, e agora temos que executar todo o pendente”.
Todas as persoas interesadas na formación de Apaga poden obter máis información no seguinte correo electrónico apagaribadeo@gmail.com ou chamando aos teléfonos 639 88 49 45 ó 629 09 67 11.