A última xunta de goberno local concedeu licenza para a posta en marcha dunha explotación de kiwis na parroquia de Ove, que ocupará unha superficie de 20 hectáreas. E tamén foi autorizado o acondicionamento dunha edificación en Vilaframil para crear un centro social a través de 2 vivendas comunitaria para 18 persoas. O alcalde, Fernando Suárez, subliñou a seguridade xurídica que o PXOM ofrece a quen quere instalarse en Ribadeo, producir en Ribadeo ou vivir en Ribadeo.
O rexedor comentou: “ Nesta xunta de goberno que celebramos onte, demos as correspondentes autorizacións municipais para unha serie de actuacións moi importantes para o noso concello”.
Suárez Barcia explicou que “demos as licencias para unha explotación de kiwis na parroquia de Ove”. O alcalde ribadense asegura que esta iniciativa poñerá en valor o sector primario para diversificar a economía local.
O alcalde contou que “tamén demos autorización para unha clínica de podoloxía e un negocio de reparación de calzado. E tamén a xunta de goberno local autorizou o acondicionamento dunha edificación para a creación dun centro social a través de dúas vivendas comunitarias para un total de 18 prazas”.
Fernando Suárez engadiu que “Ribadeo conta cun Plan Xeral de Ordenación Municipal e cun específico para o casco vello que contribúen cada día a dar seguridade xurídica e ofrecer posibilidades para instalarse en Ribadeo, producir en Ribadeo ou vivir en Ribadeo, que é do que se trata”.
