O alcalde, Fernando Suárez, e os concelleiros de Servizos Sociais e Medio Rural, Mónica Freire e Marcos Villamil, visitaron hoxe en Remourelle a Mercedes Trevín, unha ribadense que cumpre 101 anos.

A homenaxeada contoulles que lle gusta moito ler a prensa e seguir a actualidade na televisión. O segredo da súa lonxevidade estivo “en traballar moito, na agricultura, e en comer ben”. Mercedes Trevín estivo acompañada pola súa filla e polos seus cuñados.

Como agasallo recibiu unha placa do Concello de Ribadeo na que se pode ler: “a Mercedes Trevín Fernández nos 101 anos do seu nacemento”.

O rexedor e os edís quixeron renderlle así homenaxe a esta veciña, que se amosou moi agradecida pola visita e que lles lembrou a todos os presentes que o seu 101 aniversario é mañá, 17 de decembro.