A Consellería do Medio Rural, a través da Axencia Galega de Desenvolvemento Rural (Agader), achegará 40.000 euros ao Concello de Riotorto para a humanización da área recreativa de Ferreiravella.

En concreto, o convenio asinado pola Xunta de Galicia e o goberno local riotortense contempla o acondicionamento do acceso e rasanteo de base do aparcamento, a pavimentación da zona de visitantes, a mellora e reparación do equipamento e obras para garantir a seguridade da contorna e os seus elementos.

Agader cumpre con este acordo, asinado polo director, Miguel Pérez Dubois, e o alcalde de Riotorto, Clemente Iglesias, un dos seus obxectivos, o de promover a cooperación entre axentes públicos e privados que incidan no desenvolvemento das zonas rurais.

FIXAR POBOACIÓN

A través deste tipo de iniciativas, a axencia dependente de Medio Rural quere facer máis atractivo o campo galego, mellorar a calidade de vida dos seus veciños e así fixar poboación nas áreas rurais. Está especialmente interesada no acondicionamento ou creación de infraestruturas de lecer orientadas a ofertar unha maior gama de servizos aos cidadáns.