. O Concello de Trabada acolleu este pasado martes a presentación do programa InecoRuraltic, promovido dende o Ministerio de Transporte, Movilidad y Agenda Urbana co obxectivo de contribuír a impulsar o medio rural a través da dixitalización.

Durante os próximos 15 días, desenvolveranse diferentes actividades e sesións formativas impartidas por dous técnicos do Ministerio, que guiarán e resolverán as dúbidas de Pemes, autónomos e particulares.

“Grazas ás xestións realizadas desde o concello, Trabada é un dos 55 concellos con menos de 10.000 habitantes de toda España que resultou beneficiario deste programa Rural TIC, así que animo ao conxunto da veciñanza e ao noso tecido empresarial a aproveitar a oportunidade de contar cun asesoramento profesional e directo”, subliña a alcaldesa de Trabada, Mayra García Bermúdez.

A formación do programa InecoRuraltic céntrase no eido da dixitalización social -unha formación especialmente dirixida á poboación maior de idade que xira sobre o uso das novas tecnoloxías, redes sociais, banca móbil, citas médicas ou trámites administrativos-, e no ámbito da dixitalización económica -asesorando ao tecido empresarial sobre o seu posicionamento dixital, creando ou mellorando os servizos web ou implementando a súa presenza en redes sociais-.

Tralos dous primeiros talleres impartidos onte, as sesións que se impartirán na Casa do Cultura do Concello continuarán estes días cun calendario que inclúe na súa programación:

– Hoxe, mércores 15 marzo: mensaxería instantánea e banca electrónica.

– Venres 17: redes sociais no seu uso persoal ou enfocado a empresas, así como actividades prácticas xunto á edición de fotos etc..

– Luns 20: seguridade dixital, pegada dixital e actividades prácticas.

– Martes 21: taller práctico para resolver dúbidas.

– Mércores 22: aplicacións de saúde do SERGAS, banca móbil etc. Así como resolución de dúbidas nos trámites.

– Xoves 23: seguridade na rede. A sesión impartirase no colexio de Trabada.

O acto de clausura destes talleres levarase a cabo o venres 24 no Concello de Trabada. Ademais, as Pemes e autónomos poden solicitar no Concello de Trabada sesións formativas individuais cos técnicos do Ministerio.