Mayra García Bermúdez tomou hoxe posesión como alcaldesa de Trabada, no transcurso da sesión constitutiva da nova Corporación Municipal celebrada no concello.

“Seguiremos facendo unha xestión cercana e a pé de rúa, escoitando os veciños e comprobando “in situ” as súas necesidades, como fixemos durante estes oito anos”, asegurou García Bermúdez no seu discurso.

En palabras da alcaldesa, “seguiremos dando o mellor de nós para atender as necesidades dos veciños; para iso, vai ser esencial a cooperación entre todas as administracións, ás que brindamos a nosa colaboración e apoio, pero tamén seremos firmes e esixentes cando as circunstancias o requiran”.

García Bermúdez fixo un repaso dos últimos anos, “nos que puxemos en marcha moitos dos servizos públicos que este concello demandaba”, con especial atención aos maiores e os nenos.

A alcaldesa tivo palabras de agradecemento “para o meu equipo, para todos os que me brindaron a súa confianza e o seu compromiso durante estos oito anos”.

“Ser alcaldesa de Trabada foi e é, ante todo, unha honra, pero sobre todo unha gran responsabilidade. Por iso, dende o primeiro día, fai xa oito anos, asumín este importante e fermoso traballo con toda a dedicación que merece este cargo. O meu compromiso é ser alcaldesa de todas e todos os trabadenses”, rematou.