A Xunta de Goberno da Deputación Provincial anunciou este venres a creación na parroquia de Vilaformán, en Trabada, dun centro para “favorecer o acceso ás novas tecnoloxías” da poboación rural e dinamizar así “a vida social e económica do municipio”.

Así o anunciou o deputado de Promoción Económica e Social, Pablo Rivera, tras a celebración da reunión ordinaria da Xunta de Goberno. Rivera, que definiu o proxecto como “unha iniciativa de carácter innovador”, precisou que a deputación sufragará “máis do 90% do custo total da actuación”.

O centro de novas tecnoloxías recibirá unha inxección económica de máis de 48.000 euros por parte da Administración provincial e permitirá rehabilitar o antigo teleclub de Vilaformán para “favorecer o acceso a internet” e o “uso doutras ferramentas dixitais” a medio centenar de veciños da parroquia.