A Xunta de Galicia financiará as obras de rehabilitación da antiga escola de Trabada para crear un centro etnográfico. O Executivo autonómico investirá un total de 272.000 euros nesta actuación, e o Concello asumirá os gastos de redacción do proxecto e dirección de obra, que ascenden a 13.714 euros.
A escola, actualmente en desuso, está situada no trazado do Camiño norte e logo da súa rehabilitación exercerá como centro expositivo e punto de información turística.
A Consellería de Medio Ambiente e Ordenación do Territorio custeará a recuperación da volumetría orixinal da escola, eliminando os catro edificios anexos. O bloque que alberga os aseos e os soportais dianteiros serán reconstruídos a causa dos danos que presenta a estrutura. Tamén se renovará a cuberta, os acabados dos paramentos exteriores e faranse obras no interior da escola. Disporanse dous baños na planta baixa habilitados para persoas con mobilidade reducida.
O delegado territorial da Xunta, José Manuel Balseiro, visitou o inmoble acompañado da alcaldesa trabadense, Mayra García. Balseiro explicou que o Goberno galego deseñou un programa de axudas dirixido a mellorar os equipamentos e infraestruturas urbanas dos concellos, co obxectivo de frear o despoboamento. Nos casos dos municipios con menos de 5.000 habitantes, a achega autonómica é do cento por cento do orzamento das obras.
CENTRO ETNOGRÁFICO
García espuxo que o museo contará con varias seccións: etnografía (oficios, vida rural, vivenda), así como historia local, arquivo bibliográfico e fotográfico. O Concello dispón de abundante material, desde apeiros ata utensilios de pesca, unha colección de máquinas de coser e unha reprodución da escola dos anos 40. Boa parte deste patrimonio material foi doado por un veciño, José Rocha, e o goberno local terá agora un espazo para mostrar este legado.
ÁREA RECREATIVA DA CHOZA
O Goberno galego tamén destinará, a través da área de turismo, 36.000 euros para mellorar a sinalización e os puntos de luz na área recreativa da Choza.
