A Garda Civil investiga un veciño de Santiago de Compostela, de 30 anos de idade, como presunto autor dun roubo no interior dun turismo estacionado na localidade lucense de Trabada.

Fontes policiais explicaron que o roubo tivo lugar o pasado mes de abril, cando o sospeitoso presuntamente subtraeu do interior dun vehículo varios efectos, entre eles un computador valorado en 10.000 euros.

O suposto ladrón foi identificado despois de que tentase vender o computador a través de diferentes canles. A Garda Civil localizou os efectos subtraídos e as dilixencias foron trasladadas ao xulgado de instrución número 2 de Mondoñedo.