A alcaldesa de Trabada, Mayra García Bermúdez, considera “unha falta de respecto institucional” que o delegado da Xunta en Lugo, Javier Arias, informe dunha visita a unha obra realizada no concello con menos de 24 horas de antelación.

O gabinete do delegado da Xunta informou ao concello o mércores ás 16:00 horas da visita o pasado xoves, ás 11:00 horas, ás obras realizadas na ponte que une a parroquia trabadense de Valboa e a ribadense de Cedofeita.

“Curiosamente a visita foi o mesmo día e a mesma hora que a xunta de goberno da Deputación de Lugo, que se celebra semanalmente. Causalidade ou non, é unha vez máis unha mostra da falta de respecto institucional do delegado”, afirma García Bermúdez.

A alcaldesa propúxolle facer a visita pola tarde ou o luns ou martes da semana que vén, pero foi imposible debido á axenda do delegado da Xunta. “Se organiza o seu traballo con varios días de antelación, non ten xustificacion que avise dunha visita a un concello unhas horas antes”, remata. Non é a primeira vez que o delegado da Xunta, Javier Arias, visita o Concello de Trabada avisando só unhas horas antes.