Os senadores do PP por Lugo reclamaron explicacións ao Executivo de Pedro Sánchez sobre as causas do incidente rexistrado nun punto da estrada N-642, no que unha fenda trouxo o peche do tráfico dun tramo durante 48 horas. Ademais, insisten ao Goberno que “sexa claro” sobre os prazos de construción da A-74, a autovía proxectada para A Mariña.
O pasado 21 de xaneiro na N-642, vía que tamén vertebra esta comarca, producíanse varias fendas na estrada como consecuencia dunha importante focha, de varios metros de profundidade, que significou o peche desta, o que causou, segundo o PP, “importantes prexuízos aos veciños”.
Os senadores populares esixiron ao Executivo que se dean a coñecer os prazos previstos para a restitución da normalidade na estrada nacional de forma que “se poida garantir o tráfico de vehículos en condicións de seguridade”.
O PP de Lugo lembrou na Cámara Alta que esta vía conecta co Hospital da Mariña, o porto de San Cibrao e os de Burela e Celeiro, ademais de “ser fundamental”, segundo o partido, para moitas empresas da zona, “como as madeireiras”.
Desde o PP aseguran que en “diferentes cámaras” xa se presentaron iniciativas “interesándose sobre as causas, as actuacións previstas e a seguridade dos usuarios” ao longo de toda a vía.
“ATRASO NAS OBRAS DA A-74”
Durante a súa intervención na Cámara Alta, os senadores populares tamén insistiron en que desde o Ministerio de Transportes “débense dar pasos firmes” na construción da autovía A-74.
Os representantes lucenses do PP aseguran que xa advertiran “en numerosas ocasións” que a redución das partidas económicas consignadas nos Orzamentos Xerais do Estado que o Goberno estatal aprobou nos últimos anos ía provocar un “atraso nas obras da A-74”.
Neste sentido, o PP de Lugo denuncia que desde o Goberno se ignorasen as emendas que presentaran no seu momento para favorecer o avance do proxecto desta vía e esixe a Sánchez “un compromiso claro con esta infraestrutura”, así como que dea a coñecer os prazos previstos para a construción.
Por outra banda, o Grupo Popular, a través do deputado e portavoz de Infraestruturas, José Manuel Balseiro, reclamou a activación dun “plan anual de conservación de estradas de titularidade estatal”, similar, asegura Balseiro, ao que “xa ten a Xunta”.
De igual modo, o grupo do PP na Deputación de Lugo reclamará no pleno provincial “solucións e investimentos” para as infraestruturas viarias da comarca e instará o Goberno de Sánchez a que “aposte dunha vez” por estas.
