O BNG de Viveiro sinala que as insistencias da veciñanza, en prensa e no pleno municipal, conseguiron que deran comezo as obras para o ensanchamento do vial de Campo de Verde en apenas uns meses despois de “anos e anos acumulando sustos e preocupacións ao non poder entrar vehículos de emerxencias como bombeiros, ambulancias medicalizadas e incluso servizos básicos como é o habitual servizo de recollida de lixo”.
Os nacionalistas criticaban a postura da alcaldesa, María Loureiro, quen expoñía o argumentario de “sen PXOM non podemos facer nada”. A portavoz do BNG, Míriam Bermúdez, falaba de buscar “atallos” legais necesarios que permitiran o ensanchamento do vial sen agardar pola suposta aprobación do PXOM, que tamén precisaría doutros informes externos favorables para poder realizalo.
