O secretario xeral do PP de Lugo, Carlos Armesto, asegurou este luns que “están perfectamente canalizadas” as saídas de Julia Rodríguez como presidenta dos populares de Monforte de Lemos e de Antonio Bouza, voceiro municipal en Viveiro, que marchan por diferenzas coa dirección provincial.

O número dous dos populares de Lugo adiantou que este luns, ás cinco da tarde, presentarase ao candidato á alcaldía e presidente da xestora, Miguel González Lemos.

En Viveiro, onde o voceiro anunciou a pasada semana que dimitía dos seus cargos, non hai, por agora, candidato. Armesto fixo especial fincapé na rapidez para “a posta en marcha” dunha xestora, que preside o parlamentario nacional Jaime de Olano, sobre quen recaerá a responsabilidade de “elaborar un candidato e unha lista alternativa”.

TRES RENUNCIAS EN TRES MESES

Antonio Bouza, candidato nas eleccións de 2015, renunciou a principios de xaneiro a ser cabeza de lista pola “falta de confianza” mostrada pola dirección do partido.

Finalmente, demitiu como edil -xunto á concelleira Cristina Goás– e como voceiro dos populares por discrepancias co delegado territorial da Xunta de Galicia, José Manuel Balseiro.

As demisións de Goás e de Bouza súmanse á presentada no pasado mes de novembro pola edil Chus Vale, moi crítica coa xestión da Xunta de Galicia da riada que custou unha vítima mortal en Xunqueira.