O goberno da Deputación de Lugo presentará no vindeiro pleno provincial -que se celebrará o martes 26 de febreiro- a proposta de Plan Único para 2019. Dos 21 millóns dos que está dotado o proxecto, prevese que 4.935.955 euros sexan destinados aos 16 concellos da Mariña Lucense, unha cantidade similar á do ano anterior. 

Como novidade, o goberno provincial incorpora na súa proposta un anticipo do 50% dos fondos aos concellos para inxectar canto antes no conxunto da provincia a metade do orzamento do plan, uns 10,5 millóns. De aprobarse, de seguido as administracións locais poderán solicitar este adianto e presentar os proxectos.

O obxectivo do plan, segundo resalta o goberno provincial, é “mellorar ou incrementar os servizos e prestacións públicas aos máis de 330.000 veciños dos 67 concellos de Lugo”.

Así, os fondos poderanse utilizar en novas obras en instalacións municipais, servizos sociais, emprego, iniciativas turísticas, deportivas e culturais, administración electrónica e protección civil.

CRITERIOS

O orzamento total, asegura a Deputación, distribúese en base aos seguintes criterios obxectivos: poboación, superficie, núcleos poboacionais e taxa de envellecemento. Isto supón máximos de 500.000 euros en Viveiro, Lugo, Monforte de Lemos, Vilalba e Sarria, e mínimos duns 200.000 en Negueira de Muñiz, Rábade ou Triacastela.

OBRIGAS

As administracións locais deberán destinar como mínimo o 50% dos fondos a investimentos. Isto implica que cando menos 10,5 millóns de euros sexan para novas melloras nas instalacións públicas (acondicionamento de accesos, estradas, rúas, instalacións deportivas ou culturais, traídas de auga ou alumeados públicos).

Tendo en conta a taxa de envellecemento e a necesidade de ofrecer servizos sociais aos maiores da provincia, os municipios terán que destinar un mínimo de 1,5 millóns de euros ao Servizo de Axuda no Fogar a persoas non dependentes. Unha prestación “para a que a Xunta de Galicia non achega nin un só euro”, afirma o presidente da Deputación, o socialista Darío Campos.

POR CADA MUNICIPIO

Aquí podes comprobar cal sería a achega a cada municipio da Mariña.