O Concello de Viveiro enviou un escrito a Portos de Galicia no que solicita a demolición das naves do peirao. A obra, esperada desde hai anos na localidade, permitiría a apertura da localidade ao mar e unha maior capacidade de aparcamento, especialmente durante o verán, cando o municipio multiplica a súa poboación.

Desde o goberno local resaltan que no pasado mes de xaneiro pediron ao ente autonómico información sobre os trámites que se están a realizar para derrubar os galpóns e para coñecer as datas nas que se prevía levar a cabo a demolición. Portos de Galicia indicou ao respecto que estaba pendente a acta de formalización da reversión e recuperación dunha das naves, que se prevía eliminar durante os seguintes dous meses.

“NECESIDADE”

O escrito do Concello de Viveiro pregunta que avances fixo Portos neste sentido e cando se iniciará a demolición dos galpóns, unha actuación que considera “necesaria por estética, funcionalidade e seguridade”.