O goberno local de Mondoñedo celebrou este luns o pleno de organización do mandato que vén de comezar, no que se aprobou -cos votos a favor do PP e a abstención de PSdeG-PSOE e BNG– a creación de dúas novas concellerías -a área do Maior e a de Participación Cidadá, Asociacionismo e Camiño de Santiago– e tres dedicacións parciais de 17.300 euros brutos anuais cada unha en 14 pagas.
A alcaldesa, a popular Elena Candia, asumirá a concellería do Maior e a de Turismo e Patrimonio Inmaterial.
A rexedora, presidenta do PP lucense, que no anterior mandato percibiu unha dedicación parcial como deputada provincial, cobrará unha retribución por levar estas áreas. Por agora non está confirmada a súa presenza no organismo provincial en representación dos populares da Mariña Lucense, aínda semella o máis probable.
REPARTO DE ÁREAS
Manuel Ángel Otero Legilde, primeiro tenente de alcalde, será concelleiro de Persoal, Medio Ambiente e Medio Rural.
María Ángeles Rodríguez Rico, edil de Facenda e de Benestar, exercerá ademais como voceira do Goberno. Percibirá unha dedicación parcial.
José Otero Rejes, concelleiro de Obras, Servizos e Rehabilitación, desfrutará dunha dedicación parcial, ao igual que no anterior mandato. Manuel Tapia Rivera será o edil de Deportes e Promoción Económica.
Alberto García Fernández, levará as áreas de Educación, Cultura e Novas Tecnoloxías. Patricia Otero Doural será a concelleira de Participación Cidadá, Asociacionismo e Camiño de Santiago. Finalmente, Beatriz Meilán Rego exercerá como edil de Igualdade, Conciliación e Xuventude.
ASPIRA A “REBAIXAR O IBI”
Candia asegura que un dos obxectivos máis inmediatos para este mandato será “revisar os valores do IBI, que se atopan desaxustados“, e acometer de maneira urxente o encargo dun informe ao servizo de Intervención “para que nos dea a alternativa admisible de rebaixa ou eliminación da plusvalía”.
A rexedora explica que se chegou a unha situación económica no Concello que permite unha revisión dos impostos locais, o que “previsiblemente permitirá unha rebaixa dos mesmos. Desde a nosa chegada ao Goberno local rebaixamos o que puidemos (taxas, IBI no rural, IBI para quen cree emprego), pero agora imos intentar acometer unha revisión máis ampla que chegue a todos os mindonienses”, sostén.
