EFE. A presidenta do Partido Popular de Lugo, Elena Candia, confirmou que, de momento, a súa organización só designou ao ex alcalde de Vilalba, Agustín Baamonde, para ser deputado na futura corporación provincial, cuxa constitución está aínda á espera dos recursos presentados nos municipios de Monterroso e Burela.

Candia precisou que, xustamente a causa desta circunstancia, o PP só celebrou a reunión correspondente ao Partido Xudicial de Vilalba, na que Agustín Baamonde foi elixido para ser deputado provincial.

ÁNIMOS ÁS AGRUPACIÓNS LOCAIS

De feito, a presidenta do PP lucense precisou que a directiva provincial dedicouse nas semanas posteriores ás eleccións municipais -que se celebraron o pasado 26 de maio- a manter reunións con aquelas agrupacións electorais nas que os resultados foron peores neses comicios.

Encontros, precisou, para “animar á xente e agradecerlles o traballo feito”, sempre coa mirada posta en estar “máis preparados” para a vindeira convocatoria electoral, que son as eleccións autonómicas do vindeiro ano.

REUNIÓN PENDENTE NA MARIÑA

No tocante á elección dos deputados provinciais, dixo que o PP vai aínda “en tempo” e a súa idea é celebrar esta semana as correspondentes reunións en varios partidos xudiciais.

Un dos que está pendente desa reunión é o de A Mariña Lucense, partido xudicial polo que se presenta a propia Candia, que podería repetir na Deputación como voceira do grupo provincial do PP.

“Non é unha decisión que se tome en solitario”, dixo Candia en declaracións a Efe, pero lembrou que “hai un traballo feito e unha traxectoria” na Deputación que se exporá nesa reunión cos concelleiros da Mariña.

Candia confía en pechar este proceso con total “unidade” dentro do partido e “sen ningún conflito”.