InicioPolíticaLlano espera concretar o luns co BNG "un documento de referencia" para...

Llano espera concretar o luns co BNG “un documento de referencia” para a súa investidura

O candidato do PSdeG descarta unha coalición e aspira a un pacto "para a lexislatura", mentres que o Bloque non concreta esixencias programáticas e buscará "a mellor solución"

Publicada o

- Advertisement -

As agrupacións locais de PSdeG-PSOE e BNG reunironse este xoves para avanzar nun acordo para a formación de goberno en Burela. As formacións socialista e nacionalista manterán o vindeiro luns outra xuntanza, en principio a última antes do pleno de investidura, que será o venres 5 de xullo.

O rexedor en funcións e candidato socialista, Alfredo Llano, asegurou que espera que o luns ambas formacións poidan chegar a un acordo e “mesmo concretar un documento de referencia” para a súa investidura.

Malia que nas pasadas eleccións municipais os socialistas perderon un edil e a maioría absoluta mentres que os nacionalistas gañaron un concelleiro, Llano móstrase decidido a gobernar en minoría e a chegar a acordos puntuais.

MARCO DE COLABORACIÓN PSOE-BNG

Non haberá goberno en coalición en Burela”, reitera Llano, para sinalar que a agrupación socialista burelá “respecta” o marco de colaboración para a formación de executivos tanto a nivel municipal como provincial acordado por PSOE e BNG, pero que “hai que ter en conta as particularidades de cada municipio”.

Con todo, o alcalde en funcións admite que a estabilidade do goberno requerirá “dun BNG con protagonismo. Hai entendemento e queremos chegar a un acordo non só para a investidura, senón tamén para a lexislatura”, asegurou.

PROGRAMAS

Pola súa banda, o candidato do BNG, Mario Pillado, sostivo que desde a formación non se descartan escenarios, “pois temos un compromiso coa veciñanza de Burela e buscaremos a mellor solución posible”.

O líder dos nacionalistas burelaos expón que a xuntanza centrouse “en propostas programáticas”, pero non concreta polo de agora que compromisos considera o BNG imprescindibles para apoiar a investidura de Llano.

CONTENCIOSO DE BURELA SEMPRE

Burela é un dos poucos concellos galegos que non celebrou aínda a investidura, logo de que Burela Sempre presentase un recurso ante o Tribunal Superior de Xustiza de Galicia (TSXG). O partido que fundou Manuel Martínez xógase nun voto gañar un representante na corporación ou que o BNG manteña o terceiro, tal e como aprobou a Xunta Electoral.

Agárdase que o TSXG decida como moi tarde o martes sobre o contencioso de Burela Sempre. Neste senso, desde o partido nacionalista agardan que o alto tribunal dea a razón á Xunta Electoral e que valide o reparto de concelleiros: seis para o PSdeG-PSOE, catro para o Partido Popular (PP) e tres para o Bloque.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...