A deputada parlamentaria e ex concelleira de Burela Patricia Otero será a secretaría xeral do PSdeG-PSOE na provincia de Lugo.
Otero impúxose ao alcalde de Castroverde, José María Arias, o seu rival nas primarias do PSOE lucense, con algo máis do 66% dos votos. A burelá recibiu 786 apoios, por 367 do seu opoñente.
A deputada parlamentaria mariñá -nacida en Monforte de Lemos no 1979- sucede así a Álvaro Santos Ramos, que presentou a súa renuncia no pasado mes de xuño.
A militancia socialista da provincia de Lugo elixiu a quen será a nova secretaria xeral provincial, Patricia Otero.
Parabéns a ámbolos dous candidatos polo seu traballo e resultados, e moitos éxitos a Patricia nesta etapa de traballo por un @PSdeG forte ao servizo da cidadanía. pic.twitter.com/VQvwBtq6dz— Gonzalo Caballero (@G_Caballero_M) 20 de xullo de 2019
Licenciada en Dereito pola Universidade de Santiago de Compostela, Otero tomou posesión do cargo como deputada parlamentaria no pasado mes de setembro. Comezou a súa carreira política como edil en Burela. Na súa primeira tentativa a ocupar a secretaría xeral do PSOE lucense cedeu ante Santos Ramos, ao igual que o fixo Arias.
AS AUTONÓMICAS, PRIMEIRO OBXECTIVO
A deputada no Parlamento galego deberá coser unha agrupación provincial inmersa nunha situación convulsa, que quedou patente coa demisión de Santos Ramos e o relevo de José Tomé en detrimento de Darío Campos como presidente da Deputación. Afín a Gonzalo Caballero, o primeiro obxectivo de Otero será sumar forzas de cara ás vindeiras eleccións autonómicas, no 2020.
