Un home resultou ferido este mércores nun accidente de tráfico que aconteceu na Autovía do Cantábrico (A-8), á altura do municipio de Ribadeo, sobre as 8.34 horas, momento no que o Centro Integrado de Atención ás Emerxencias (CIAE) do 112 recibiu aviso do sinistro.
Tratouse dunha saída de vía á altura do punto quilométrico 514, en sentido de circulación cara Asturias. O turismo no que viaxaba o ferido quedou enganchado no quitamedos.
O CIAE do 112 Galicia puxo en coñecemento do sinistro a Urxencias Sanitarias, Protección Civil, Bombeiros de Barreiros, Policía Local e Garda Civil, ademais dos servizos de mantemento da autovía.
Unha vez no lugar, os propios bombeiros confirmaron que as persoas afectadas eran accesibles, sen necesidade de utilizar material de excarceración. O ferido foi trasladado ao Hospital Público da Mariña despois de recibir os primeiros auxilios. En principio, o seu estado non revestía gravidade, segundo confirmou Tráfico a Efe.
Descoñécense as causas polas que o condutor perdeu o control do vehículo ata saírse da estrada.
