O BNG de Barreiros rexistrou un escrito con 150 sinaturas de veciños da zona costeira do concello e de persoas que teñen a súa segunda residencia no municipio para solicitar ao goberno local explicacións das “actuacións, investimentos e xustificación das mesmas realizadas nos servicios municipais”, así como do “sistema de control que se ten establecido desde a alcaldía para garantir o funcionamento dos servizos públicos”.
Os nacionalistas quixeron facer de “autofalantes” dos veciños e das persoas que viven parte do ano en Barreiros, e que “tamén contribúen ás arcas públicas”. Na recollida de sinaturas, que durou dous días, e nas asembleas, mantidas ao longo do mes de agosto, os barreirenses “trasladáronnos a súa preocupación e malestar pola deriva do municipio”, afirma a voceira do grupo local do BNG, Ana Ermida, que engade que “poidemos constatar que o malestar é cada vez maior”.
“RECUPERAR O BO NOME”
Desde o BNG barreirense sosteñen que “cada vez temos menos e peores servizos, e por riba, máis caros”, e esixen “algunha explicacións sobre as razóns para que Barreiros camiñe cara atrás en todos os sentidos. Queremos que no pleno de setembro se faga un exercicio de análise e traballar para que o municipio recupere o bo nome”, conclúen.
