A histórica demanda de mellores infraestruturas centra as valoracións dos partidos da oposición respecto dos investimentos previstos para A Mariña no proxecto de orzamentos da Xunta de Galicia.

BNG e PSOE centran as críticas no millón e medio de euros previstos para a Vía de Altas Prestacións (VAP) Ferrol-San Cibrao na zona entre Xove e Viveiro.

A formación nacionalista cualifica esta cantidade de “ridícula” fronte aos “60 millóns” que, din, “a consellería de Infraestruturas anunciaba hai dous anos“.

A VAP Ferrol-San Cibrao, en proxecto desde o 2001, só ten abertos 16 dos 80 quilómetros previstos

O PSOE provincial tamén se referiu á falta de avances na construción da vía para a que en 2018 se consignaron preto de 2,2 millóns de euros. “Nunca vimos máquina algunha traballando, por exemplo, na VAP da Mariña”, dixo o secretario xeral do PSOE na provincia, Álvaro Santos, ao valorar os orzamentos do goberno galego.

“NO VAGÓN DE COLA”

Os nacionalistas enmarcan as previsións para a VAP nun “recorte nos investimentos” na Mariña e afirman que “a falta de compromiso” coas infraestruturas prexudica gravemente a competitividade dos sectores económicos empurrando á comarca “ao vagón de cola”.

Ademais, critican que “non se contemple un só euro” para o saneamento e arranxo do emisario da ría de Viveiro, a rede de abastecemento no concello de Ribadeo ou o “saneamento da maioría dos concellos”.

O BNG denuncia un “recorte nos investimentos” que impide o desenvolvemento económico da comarca

A responsable comarcal, Ana Ermida, anunciou que o BNG presentará emendas ao proxecto de contas do goberno galego co propostas que atendan as “necesidades reais” e revirtan na “mellor integral” da bisbarra.

Na súa valoración sobre os orzamentos, Ermida interpelou directamente aos representantes comarcais do Partido Popular José Manuel Balseiro, Daniel Vega e Elena Candia, aos que acusou de “vender fume”.

PARTIDO POPULAR

Desde as filas populares, poñen en valor as partidas destinadas a actuacións en Burela e Viveiro.

O PP burelao subliñou os investimentos previstos na ampliación e acondicionamento do Hospital da Costa –“900.000 euros”- , en actuacións en seguridade portuaria –que cuantifican en 700.000 euros – e na EDAR de Burela – 776.000 euros- que, aseguran, “permitirán licitar a obra”.

O voceiro popular, Manuel Rouco, referiuse tamén á falta de achegas para ao novo pavillón que atribúen á “incapacidade de negociar” do rexedor, o socialista Alfredo Llano.

O PP contabiliza 2,4 millóns de euros de investimentos en Burela; e 5,2 millóns en Viveiro

Pola súa banda, o PP de Viveiro fixo repaso das contía destinadas a actuacións no municipio que estima en “5,2 millóns de euros”.

O voceiro Antonio Bouza mencionou, entre outras, as partidas orzamentadas para o saneamento de Celeiro e a mellora da EDAR de Viveiro –“466.000 euros”- ou a dragaxe do porto –“un millón de euros”-.