“O anuncio do goberno do Estado de implantar peaxes en todas as autovías públicas xerou inquietude e preocupación en todo o país polos efectos sumamente negativos que esta medida pode xerar a nivel económico e social”. Así o cre o BNG que xa anunciou a sú oposición a esta decisión do Ministerio de Transportes, Movilidad y Agenda Urbana no Parlamento galego e no Congreso.
Unha negativa que tamén trasladará aos concellos de toda a Mariña a través de mocións nas que insta ao Goberno a paralizar “o que sería un repago e un cobro abusivo polo uso dunhas infraestruturas que xa pagamos todos, tanto a súa construcción coma o seu mantemento, a través dos impostos”, apuntan nun comunicado.
“Sempre será unha medida moi lesiva para as persoas con menos recursos, os ricos sempre poderán pagar as peaxes e son os traballadores e traballadoras as que se verán excluídas de empregar estas vías de alta capacidade polas dificultades de asumir o seu custo” manifestou o deputado no Congreso Néstor Rego.
Tanto o deputado no Parlamento Daniel Castro e a responsable comarcal do BNG Ana Ermida denunciaron que, de aprobarse esta medida, a Mariña seria unha das comarcas máis prexudicadas de Lugo xa que se cobraría por usar a autovía A-74 Barreiros-San Cibrao así como a A-8 cando ainda non solucionaron o problema do Fiouco nin hai unha alternativa para mellorar a N-634 desde Mondoñedo á Xesta.
