O vicepresidente económico da Xunta, Francisco Conde, acusou ao Goberno central de seguir unha política de “disparate industrial” en Alcoa, despois de que “o PSOE permitise a paralización das cubas”.
En resposta a unha pregunta do PPdeG no Pleno do Parlamento, Conde reprocha ao Goberno seguir unha política enerxética que “dá as costas á industria” para converter a España no “único país” na UE que “tivo que deixar de producir aluminio primario porque non hai un marco enerxético que garanta a súa viabilidade”.
Así, ataca ao Executivo central por ir “en contra dos intereses da industria”, entre o que citou a situación doutras compañías electrointensivas como Megasa ou Xeal.
Tras defender a actuación da Xunta, con cuestións como a impugnación do ERE na planta de Alcoa San Cibrao, pediu ao Goberno unha “rectificación” porque as medidas actuais “non van ser suficientes para poder reactivar as cubas”. “Non hai ningún tipo de sinal por parte do Goberno para ser optimistas co futuro de Alcoa”, sentenza.
A este respecto, Conde avisa de que os contratos bilaterais de PPA (de compravenda de enerxía a longo prazo) “non son a solución para Alcoa”, “é unha parte da solución”. Reclama que se aposte tamén por unha modificación nas compensacións por CO2, redución peaxes de transporte, a posta en marcha do Perte de electrointensivas e máis medidas para gañar “competitividade” respecto doutros países da UE.