InicioCentralFozA veciña de Foz Estrella Río cumpre 100 anos, o alcalde e...

A veciña de Foz Estrella Río cumpre 100 anos, o alcalde e a concelleira de Servizos Sociais visitaron á centenaria no seu aniversario

A concelleira de Servizos Sociais, Ana Rojo, engadiu: “compartimos con Estrella parte da tarde, comprobando con que ilusión e ímpeto sopraba as velas, dando boa conta da súa saborosa torta de aniversario e do café azucrado, como a ela lle gusta".

Publicada o

- Advertisement -

Estrella Río García cumpriu 100 anos este martes, día 27, no seu domicilio de Cangas de Foz e celebrouno xunto ao seu fillo Emilio, a súa nora Esther e outros familiares, amigos e veciños. O alcalde, Fran Cajoto, e a concelleira de Servizos Sociais, Ana Rojo, visitaron e agasallaron á centenaria cunha cesta floral a modo de felicitación, cariño e recoñecemento do Concello por cumprir un século de vida.

Ana Rojo explica: “recibiunos cun sorriso e bicos cheos de tenrura e fíxonos participes das súas vivencias. Estrella naceu en Fazouro, no barrio do Cachón, de onde lembra aos seus anteriores veciños e veciñas; despois duns anos trasladouse a vivir ao casco urbano de Foz co seu marido e fillos. Foi nai dun fillo aínda que criou tamén ao seu sobriño Moncho, ao que quere igual que ao fillo. A familia aumentou con cinco netos, un bisneto e outro que está a punto de nacer. Na vila focega residiu a maior parte da súa vida ata fai 5 anos, desde cando vive en Cangas, nunha paraxe natural pretiño da praia dos Xuncos. Coidada e mimada pola súa familia, con século de vida ás costas, cada día levántase, vístese soa, fai a cama, ademais de dar os seus oportunos paseos polo xardín da casa. A súa nora Esther contounos que Estrella é unha muller moi traballadora, disposta e vital, con moita determinación á hora de aportar ingresos para o benestar da súa familia. Gustáballe moito bailar e viaxar, e así o facía sempre que podía. Outras das súas afeccións nas que destacaba era a calceta e a costura, dedicada sempre a facer roupa para os da casa”.

A concelleira de Servizos Sociais engadiu: “compartimos con Estrella parte da tarde, comprobando con que ilusión e ímpeto sopraba as velas, dando boa conta da súa saborosa torta de aniversario e do café azucrado, como a ela lle gusta. Felicidades a Estrella e á súa alegre familia, que nos recibiron amablemente e fixéronos partícipes de anécdotas e situacións vividas pola homenaxeada, deixándonos compartir un anaquiño do seu tempo nun día tan especial. Desexámoslle un feliz aniversario a dona Estrella e bo Nadal!”.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...