A Deputación de Lugo interporá un recurso contencioso ante o Tribunal Superior de Xustiza de Madrid contra a decisión do Ministerio de Transportes, Mobilidade e Axenda Urbana de aceptar a cooficialidade de ‘ría do Eo’ e ‘ría de Ribadeo’.

Na rolda de prensa tras a xunta de goberno provincial, a portavoz socialista, Pilar García Porto, explicou que esta decisión chega despois de desestimarse os recursos que conxuntamente se presentaron “con outras administraicones” para defender a denominación ‘ría de Ribadeo’.

“Adoptamos esta decisión porque se outorga a toponimia de ría do Eo como cooficial. Un feito que, como defenden os técnicos, vulnera a normativa que regula a determinación dos topónimos oficiais”, aseverou.

García Porto recalcou que a Deputación de Lugo vai seguir ” defendendo, neste proceso e sempre, a denominación oficial de ‘ría de Ribadeo’, fronte á pretensión da cooficialidade con ‘ría do Eo’ porque carece de fundamentación técnica, xurídica e tamén histórica”.

Na mesma xunta de goberno, deuse luz verde a un conxunto de investimentos que superan os 600.000 euros “para mellorar o día a día dos veciños da provincia, a través da colaboración cos concellos”. Estas contías irán para os municipios de Pedrafita e Meira.