A Garda Civil investiga a un camioneiro, veciño de Cervo de 26 anos, por conducir de forma temeraria e baixo os efectos das drogas. O vehículo foi interceptado na tarde do sábado na LU-1504 e, cando se decatou da presenza dos axentes, tratou de fuxir con manobras perigosas.

Segundo informa o Instituto Armado, o camión estaba detido á altura do kiómetro 2.2 da citada vía. No momento no que a patrulla procedeu a achegarse, reiniciou a marcha. Así, a Garda Civil comezou a seguilo, pero o seu condutor “facía caso omiso aos sinais dos axentes, aumentaba perigosamente a velocidade e efectuaba numerosas manobras perigosas, entre elas un ‘trompo’ nunha zona con afluencia de viandantes e outros vehículos”, relata o corpo.

Posteriormente, circulou por camiños de terra e sufriu varias saídas de vía. Así, a patrulla solicitou o apoio doutras ata que, finalmente, conseguiron localizar este vehículo e o seu condutor, que tamén era o titular.

O home, subliña a Garda Civil, presentaba “signos externos evidentes” de conducir baixo os efectos do alcol ou as drogas. Deste xeito, foi sometido ás pertinentes probas de detección e, aínda que deu negativo na de alcolemia, arroxou un resultado indiciario positivo na de estupefacientes.