-Este XII Foro céntrase nalgún aspecto máis específico da mecánica?
Tocamos diferentes temas, como por exemplo, carrocería, uso de pistolas de pintado, a tecnoloxía relacionada con elas, varios aspectos sobre vehículos eléctricos, a seguridade dentro dos vehículos, o uso do hidróxeno e unha perspectiva histórica sobre o automóbil en España. Houbo unha retrospectiva sobre Urovesa, unha das poucas empresas que quedan no Estado dedicadas á fabricación de vehículos. Haberá unha sesión dedicada ao motor eléctrico xunto cunha palestra sobre as diferentes experiencias Erasmus, tanto para alumnos como profesores. Tamén houbo talleres de soldadura, diagnose, sobre compoñentes de vehículos eléctricos e houbo xornadas sobre a utilización do torno.
-Sobre os programas Erasmus, cales son as grandes aportacións para este Foro?
O profesorado vai dar a coñecer as experiencias sobre as estadías no estranxeiro e no acto do alumnado van falar sobre as prácticas que realizaron en diferentes países. Os profesores céntranse na visita a centros e empresas en relación á sustentabilidade, medioambiente, dixitalización ademais de conseguir acordos para que alumnado noso poida realizar prácticas e ver como se organizan eses centros tendo en conta a sustentabilidade e dixitalización.
-Que requisitos debera ter un alumno e un profesor para entrar nun destes programas de intercambio?
O ou a alumna debe estar matriculada no centro e debe estar cursando FP básica ou grao medio. Sobre o profesorado, impartir docencia no centro ou noutra institución que non ten por que estar regrada.
-Cando se inaugurou este XII Foro achegáronse diversos representantes de institucións públicas. Cal é o tipo de implicación das institucións públicas neste Foro?
A Deputación apostou por esta actividade desde o comezo, aporta uns 3.000 euros, a Xunta de Galicia dá a homologación da actividade formativa e recoñecida e logo o Concello de Ribadeo tamén realiza a súa aportación. De momento estamos nunha fase de cambio no goberno local, por tanto aínda non se confirmou a achega das autoridades municipais, mais viñan sendo 1.800 euros.
-Cales son as vantaxes e desvantaxes de ser o único centro de profesorado de automoción e que imparte este tipo de formación de Galicia?
Entre as vantaxes están impartirmos un sistema de formación moi axeitado ás necesidades das persoas que asisten, a aula invertida. A formación conceptual impártese online e a parte procedemental faise nas nosas instalacións. As desvantaxes están en que traballamos sen axuda ningunha, a xente que quere formarse debe pagar. É un prezo asequible mais ten uns custos que debemos cubrir.
-Cales son actualmente os grandes retos de cara á formación do alumnado para o futuro?
Neste momento a cuestión é formar a xente necesaria para os talleres, formala con capacitacións requeridas para as novas esixencias. Falamos dos vehículos eléctricos, tecnoloxía do hidróxeno e toda unha serie de novas tecnoloxías que están a incorporarse no mundo do motor.
-Existe un pefil determinado de alumnado dentro dos cursos ofertados por APAGA?
Normalmente son persoas desempregadas ou profesorado con interese en mellorar a súa formación.
-Xa se está empezando a sentir a necesidade de persoal especializado en motores de nova xeración dentro da Mariña?
Polo momento a demanda na Mariña é moi baixa, mais é unha tecnoloxía que veu para quedar e estará aí en cuestión de anos, polo menos en dous ou tres anos teremos unha ampla presenza destes novos motores.
-Existe algún tipo de vehículo que se resista á adaptación para motores eléctricos ou hidróxeno como poden ser os camións?
Si, mais xa se están probando cargadores especiais para vehículos de grande tonelaxe. Polo de agora non hai moita cousa, sabemos de Mercedes e os seus experimentos con estas tecnoloxías mais aínda non está en marcha.
-Para rematar, cal é o número medio de persoas formadas que saen cada ano de APAGA?
Estamos formando sobre 370 persoas por ano segundo datos de 2022. Os cursos que facemos deixan un número moi próximo ás 400 persoas.
