O concelleiro de dinamización e participación veciñal do Concello de Barreiros, Dani García, xunto con integrantes do Colectivo Cultural Ollomao presentaron esta fin de semana a V edición da carreira popular Ao son do Masma.

A carreira popular Ao son do Masma, que se disputa este domingo, é a derradeira proba do circuíto +KmsBarreiros que pecha así a tempada 2023 con preto de 500 atletas inscritos e con moitas categorías por decidir á falta desta última proba.

A carreira absoluta, cun percorrido circular de 5.600 m. que discorre a carón do río Masma, dará comezo ás 12:00 horas con saída e chegada nas escolas de Celeiro de Mariñaos.

Tamén haberá categorías para menores, de maneira previa, cos seguintes horarios:

11:00 h. Troitiñas – Pitufos/as
11:05 h. Troitas – Sub8
11:10 h. Reos – Sub10
11:15 h. Anguías – Sub 12
11:20 h. Lampreas – Sub 14
11:30 h. Sollas – Sub 16

A saída da andaina, que terá un percorrido de 9 km, será ás 10:30 h. e os dorsais de todas as probas poderán ser recollidos a partir das 10:00 horas no propio lugar das saídas.

O prazo de inscrición finaliza este xoves, podendo facerse -ou recibir máis información- na páxina web do circuíto www.maiskmsbarreiros.gal