-Como e de quen parte a idea de celebrar este ‘Día do Orgullo Mariñeiro’?
A idea parte do xerente da Fundación Expomar. Por outra parte, desde o Padroado todos os membros tiñamos a idea de abrir a Fundación á veciñanza, non centrarnos unicamente na Feira Náutico-Pesqueira, no Produart onde se abre un pouco máis na Feira do Bonito e as Xornadas Técnicas, por iso decidimos facer unha apertura máis ampla a toda a cidadanía. Falamos co Padroado coas ideas que tiñamos en mente e o xerente propuxo varias ideas e ao final saíu este conxunto de tres liñas.
-Cal é a mensaxe detrás da celebración deste día?
Queremos abrir a entidade á veciñanza e darlle un valor engadido ao produto pesqueiro, facelo chegar a todos os centros escolares e sobre todo, darlle un valor engadido tamén á nosa flota.
-O ‘Día do Orgullo Mariñeiro’ visitará colexios da comarca para que proben nos comedores escolares a pescada de Burela. Por que esta iniciativa?
Queremos visitalos para achegarlles o produto estrela da nosa flota, describirlles como se consegue ese produto e ademais, buscamos deixar pegada nos máis pequenos e pequenas.
-Os nenos e nenas sempre foron reacios ao peixe, hai alguna fórmula preparada para que degusten este produto?
Neste caso falamos cos mesmos comedores escolares que xa teñen os seus protocolos. Entón, son eles quen van elaborar os menús coa pescada, totalmente sen espiñas. O certo é que será curioso ver como se prepararán estes pratos e se os nenos e nenas ao final escollen o peixe, aínda que non sei como se preparará.
-Logo está ‘Orgullo Mariñeiro No Escenario’ que se vai celebrar na Casa da Cultura e alí proxectarase o documental ‘Escamas. Sangue!’.
Efectivamente, vaise proxectar o de ‘Escamas. Sangue!’, produciuse hai dez anos por Adrián Canoura e Breixo Llano. Non queremos deixar atrás esta peza audiovisual, pois recordo o día da súa proxección na Confraría pois é digno de recoller porque reflicte un feito moi importante para Burela e sobre todo porque hai moita xente nova que non viviu nin veu este documental. Por iso consideramos que merece a pena volver proxectar este documental no ‘Día do Orgullo Mariñeiro’.
-Para quen non saiba, ‘Escamas, Sangue!’ que recolle?
Recolle a Guerra do Bonito con testemuñas de persoas que a viviron en primeira persoa.
-A xente do mar tamén é partícipe deste día.
Hai convidados de todo o sector. Despois de proxectar o documentario haberá un coloquio onde poderán participar todas as persoas que nos acompañen na Casa da Cultura e a maiores a terceira parte, ‘O Orgullo Mariñeiro no Teatro’ para permitir unha participación máis ampla.
-Esta xornada pode axudar na proxección de Burela cara o exterior, mesmo fóra de Galicia?
Desde logo que si. Nós sempre dicimos que temos un dos portos máis recoñecidos e máis importantes do sector no Cantábrico, por iso nos sentimos moi orgullosos de contar con este porto. Por iso, este tipo de actos dan moita proxección ao porto e á vila.
-E a presidenta da Fundación e alcaldesa de Burela, como participa neste Día do Orgullo Mariñeiro?
Pois xunto co conselleiro de Mar visitamos o comedor de onde parte o menú con peixe. Logo pasaremos por un dos CEIP para ver os nenos e nenas e como degustan ese menú e por último, despois do ‘Día do Orgullo Mariñeiro no Escenario’ faremos unha degustación na Praza do Concello.
