A secretaria de Estado de Transportes, Movilidad e Axenda Urbana, Isabel Pardo de Vera, visitou a zona de actuación de mellora da seguridade viaria na N-642 en Foz, que recibirá en total un investimento de 3,56 millóns.
O proxecto que está na actualidade en redacción, segundo informa o ministerio, ten un orzamento de 0,56 millóns, e denomínase ‘Tratamento de interseccións. Mellora de seguridade viaria. Transformación de dúas interseccións en glorietas, N-642, ppkk 39+910 e 40+970’.
Consiste na transformación en glorietas das interseccións existentes situadas nos puntos quilométricos 39+910 e 40+970 da estrada N-642, reposición de marcas viarias e iluminación, revisión e reposición da sinalización vertical, acondicionamento das zonas de circulación peonil, elementos de drenaxe e servizos afectados, ademais da reposición de accesos e outros servizos que resulten afectados polas obras necesarias para dispoñer as novas glorietas.
Na súa visita, Isabel Pardo de Vera estivo acompañada polo delegado do Goberno en Galicia, José Miñones; e a subdelegada en Lugo, Isabel Rodríguez.
OUTROS DOUS PROXECTOS EN REDACCIÓN
Durante o transcurso da mesma foron expostos ademais dous proxectos en redacción para a mellora da seguridade viaria na N-642 en Foz. O primeiro é a nova ligazón e novo acceso a Foz desde a N-642, que deberá ser sometido ao trámite de información pública a efectos de expropiacións e o seu orzamento é de 2,59 millóns.
O segundo, a reforma da intersección da N-642 coa LU-152, implantando para iso novos carrís adicionais para efectuar os xiros, a efectos de mellorar a seguridade viaria cun orzamento de 0,41 millóns.
A DEPUTACIÓN
Pola súa banda, o presidente da Deputación de Lugo, José Tomé Roca, valorou o investimento total de 3,56 millóns que fará o Goberno na N-642 ao seu paso por Foz.
Neste sentido, chamou a atención sobre o “importante compromiso” que, na súa opinión, demostra o Executivo de Pedro Sánchez coa Mariña.
