Éxito de participación no Domingo de Ruta e Cocido a Negueira de Muñiz, organizado pola asociación cultural de sendeirismo Camiñantes e Camiños de Barreiros.

O presidente de Camiñantes e Camiños, José Manuel Gómez Puente, contou que “foi un día espectacular, primaveral onde disfrutamos dunha paisaxe natural e verde, que apesares de vela aquí na Mariña alí é moito máis accidental co río Navia rodeado de grandes montañas e vendo as aldeas tanto preto desa conca fluvial como na cima das montañas”.

Gómez Puente indicou que “foron 12 km de esforzo onde todos gozamos da paisaxe e da boa gastronomía de Negueira de Muñiz, cun bo cocido galego caseiro e un viño autóctono, que destaca polas calidades e cualidades das cepas de branca lexitima da bodega Madroño, da familia Braña. Gustaríame agradecer a Elena e José Maria Braña, veciños de Negueira de Muñiz, a súa hospitalidade”.

O presidente de Camiñantes e Camiños tamén tivo palabras de agradecemento para os participantes nesta actividade: “quero agradecer tamén a boa participación nesta xornada de ruta e gastronomía que fixemos en domingo, xa que sempre é un día máis familiar. O obxectivo era facer exercicio, fomentar a amizade e o compañeirismo ademais de coñecer pobos da provincia de Lugo”.