A Plataforma de Defensa do Transporte de Madeira iniciou este luns, 24 de decembro, un paro indefinido polo que deixarán de fornecer de material ás fábricas da papeleira Ence, no concello asturiano de Navia e en Pontevedra.

Os profesionais reclaman unha mellora nas condicións de seguridade, pois teñen problemas na descarga do material “cun alto índice de accidentes”, segundo indican os sindicatos.

A plataforma presentou unha solicitude con oito puntos á firma, e asegura que “se non se atenden as nosas reivindicacións, denunciaremos a Inspección de Traballo, tanto en Pontevedra coma en Asturias“.

Outra das medidas solicitadas polos transportistas é a actualización dos custes de transporte.

DESPEDIMENTO

Os traballadores tamén reivindican que se anule o despedimento de Javier Loureiro, o camioneiro que se enfrontou violentamente -mesmo a martelazos- con dous ciclistas durante o pasado mes de outubro.

Os transportistas cren que Loureiro padeceu medidas “arbitrarias e abusivas” por parte da empresa e que non tivo dereito a defenderse.

ENCE DI QUE AS INSTALACIÓNS “SON SEGURAS”

Pola súa banda, a empresa emitiu un comunicado no que califica de “inxustificable” o comportamento do camioneiro e no que argumentou que “a seguridade é unha prioridade na nosa xestión” e que “as nosas fábricas, tamén no tocante ás instalacións de entrega de mercancías, son seguras”.