O Observatorio da Mariña pola Igualdade celebra o 28 de outubro o seu XV aniversario coa proxección dunha peza documentaria sobre o traballo realizado polo observatorio durante este tempo. Porén, a data de nacemento desta organización pola igualdade foi 8 de marzo de 2008. Os obxectivos fixados son visibilizar e sensibilizar sobre feminismo na Mariña.

A súa actividade durante estes anos conseguiu tecer unha rede de sororidade, creando lazos e agrupando a mulleres de todas as condicións e cores posibles e de todos os concellos da nosa contorna.

As accións deste Observatorio da Mariña pola Igualdade seguirán ofrecendo espazos feministas cheos de formación e información, reivindicando para as mulleres os espazos que debemos ocupar no día a día e observando, escoitando e non calando ante circunstancias que nos acorralan.

Para poñer en valor o traballo das mulleres involucradas neste Observatorio da Mariña pola Igualdade, foi creada unha peza audiovisual que recolle a actividade dos 15 anos de traballo feminista. A dirección da peza é de Carme P. Granxeiro e a participación das socias.

O documento audiovisual poderase ver o próximo sábado 28 de outubro ás 17h na Sala de exposicións e antiga carboeira do conxunto histórico-artístico de Sargadelos (Cervo) terá lugar o encontro para presentar e proxectar esta peza audiovisual e conmemorar de xeito conxunto a traxectoria do Observatorio, mediante unha intervención artística en forma de collage e guiada polo Colectivo Vacas Fracas. O Observatorio convida a todas as mulleres mariñás a achegarse ao OMI neste encontro pensado por e para todas nós.