O delegado do Goberno en Galicia, Pedro Blanco, visitou as obras xa finalizadas do carreiro peonil entre as praias de Peizás e A Pampillosa, en Foz, cunha achega de 886.000 euros e que permitirán un trazado continuado de case 15 quilómetros desde Barreiros. As obras consistiron na creación dun carreiro peonil entre ambas as praias nuns terreos expropiados que pasaron a uso de dominio público. O novo camiño permitirá o peche definitivo do paseo xa existente pola costa, entre a praia dos Fondás, na ría de Foz, e o interior da ría do Ouro.
Alí, Blanco reivindicou a aposta do Executivo pola conservación e mellora do litoral galego, cun investimento global que cifrou en máis de 68 millóns. A actuación en Foz estivo financiada polo Ministerio para a Transición Ecolóxica e o Reto Demográfico e, segundo resalta a Delegación, “evidencia o compromiso do Goberno coa posta en valor dos recursos naturais do Concello de Foz”.
DINAMIZAR A MARIÑA
Enmárcaa na súa “aposta pola dinamización económica e turística da Mariña, dentro dos 4,4 millóns de euros proxectados para distintas obras na provincia de Lugo. Blanco comprobou o resultado das obras acompañado polo alcalde de Foz, Francisco Cajoto; a subdelegada na provincia, Isabel Rodríguez, e o xefe provincial de Costas, José Miguel Estevan.
“A incorporación destes terreos para uso e desfrute dos veciños tanto de Foz como da comarca da Mariña permitirá gozar desta senda peonil de case 1.600 metros, explorando novas franxas da costa e aproveitando os valiosos recursos naturais que ten este municipio“, subliñou Pedo Blanco. O delegado agradeceu a “colaboración e o traballo do alcalde de Foz, Francisco Cajoto, co fin de continuar transformando este concello nun lugar máis amable con atractivos turísticos que conviven en perfecta harmonía coa natureza”.
